ԱՄՆ օրենսդիրները մտադիր են պարզել ամերիկացի գործարար և Microsoft-ի համահիմնադիր Բիլ Գեյթսի շփումների բնույթը ֆինանսիստ Ջեֆրի Էփշտեյնի հետ, որը մեղադրվում էր սեռական հանցագործությունների, այդ թվում՝ անչափահասների պղծման մեջ։ Դրա մասին հայտարարել է Կոնգրեսի Ներկայացուցիչների պալատի Վերահսկողության և հաշվետվողականության հանձնաժողովի նախագահ Ջեյմս Քոմերը։
Նրա խոսքով՝ հանձնաժողովի անդամներին հետաքրքրում է, թե ինչպիսի հարաբերությունների մեջ է եղել Գեյթսը Էփշտեյնի և նրա գործընկեր Գիսլեյն Մաքսվելի հետ, ինչպես նաև՝ արդյոք գործարարը տեղյակ է եղել ֆինանսիստի հնարավոր հակաօրինական գործողությունների մասին։
Միաժամանակ, Քոմերն ընդգծել է, որ այս պահին Գեյթսը որևէ իրավախախտման մեջ չի մեղադրվում և կամավոր համաձայնել է ներկայանալ օրենսդիրների հետ հանդիպմանը։ Հարցաքննությունը ծրագրվում է անցկացնել փակ ձևաչափով։
Առանձնահատուկ նշվում է, որ Գեյթսը նախկինում հիշատակվել է Էփշտեյնի գործով նյութերում, որոնց մի մասը հրապարակել էր ԱՄՆ Արդարադատության նախարարությունը՝ փաստաթղթերի լայնածավալ բացահայտման շրջանակում։ Ինքը՝ գործարարը, ավելի վաղ ընդունել էր, որ շփումներ է ունեցել Էփշտեյնի հետ, և ափսոսանք էր հայտնել այդ կապերի համար։
Ջեֆրի Էփշտեյնը մեղադրվում էր անչափահասների սեռական շահագործման կազմակերպման մեջ։ Նրա նկատմամբ քրեական գործը կարճվել էր 2019 թվականին՝ նրա մահից հետո։
Source: https://news.am/hy/news/1042591