ՆԱՏՕ-ի դաշնակիցները քննարկել են անօդաչու թռչող սարքերի արագացված գնումների ծրագիր գործարկելու հնարավորությունը՝ օդային տարածքի վերահսկողությունն ուժեղացնելու և Դաշինքի սահմանամերձ շրջաններում սպառնալիքներին արձագանքելու համար։ Դրա մասին հաղորդում է Politico-ն՝ հղում անելով դիվանագիտական աղբյուրներին։
Պարբերականի տվյալներով՝ ՆԱՏՕ-ի անդամ երկրների 32 դեսպանների փակ հանդիպման ժամանակ դիտարկվել է անօդաչու սարքերի քանակի հրատապ ավելացման անհրաժեշտության հարցը, որոնք կարող են օգտագործվել օդային տարածքի մշտադիտարկման և պաշտպանության առաքելություններում, հատկապես՝ Ուկրաինային և Ռուսաստանին սահմանակից շրջաններում։
Նշվում է, որ քննարկումն անցկացվել է եվրոատլանտյան անվտանգության համար պահպանվող ռիսկերի, այդ թվում՝ Սև ծովում տիրող իրավիճակի ֆոնին։ Մասնավորապես, ընդգծվել է Ռումինիայում ՆԱՏՕ-ի ներկայության ուժեղացման և կարևորագույն ենթակառուցվածքների, ներառյալ՝ տարածաշրջանի էներգետիկ նախագծերի պաշտպանության անհրաժեշտությունը։
Ըստ հանդիպման մասնակիցների՝ Դաշինքը դիտարկում է անօդաչու համակարգերին առնչվող սպառնալիքների հակազդմանն ուղղված նախաձեռնությունների իրականացումն արագացնելու տարբերակներ։ Վերջնական որոշումները կարող են ներկայացվել ՆԱՏՕ-ի առաջիկա գագաթնաժողովին։
Քննարկվել է նաև Դաշինքի ռազմական հրամանատարության դերը ծովային և օդային անօդաչու սարքերի կողմից բխող հնարավոր սպառնալիքների մշտադիտարկման գործում, այդ թվում՝ Սև ծովի էներգետիկ ենթակառուցվածքների օբյեկտների մոտակայքում։
Source: https://news.am/hy/news/1042641