Բիլ Գեյթսի և նրա նախկին կնոջ՝ Մելինդայի ամուսնալուծության գործընթացի ընթացքում միլիարդատերը բախվել է ավելի քան 20 արտաամուսնական կապերի մեղադրանքների։ Այդ մասին Microsoft-ի համահիմնադիրը անձամբ պատմել է Գեյթսի բարեգործական հիմնադրամի (Gates Foundation) աշխատակիցներին փակ և բավական լարված ընդհանուր ժողովի ժամանակ, հայտնում է Wall Street Journal թերթը։

Պարբերականի աղբյուրների խոսքով՝ փետրվարյան հանդիպման ընթացքում 70-ամյա Գեյթսը ճնշված տեսք ուներ։ Նա պաշտոնապես հաստատել է միայն ռուս կանանց հետ երկու սիրավեպ, որոնք հիշատակվում են Ջեֆրի Էպշտեյնի գործով հրապարակված փաստաթղթերում, սակայն աշխատակիցներին շոկի է ենթարկել՝ խոստովանելով, որ 2021 թվականի ամուսնության իրավական լուծարման ընթացքում շրջանառվել են ևս երկու տասնյակ դավաճանությունների մասին պնդումներ։

Բիլ և Մելինդա Գեյթսները ամուսնացած են եղել 27 տարի։ Ժողովի ընթացքում միլիարդատերը հերթական անգամ հրապարակային ներողություն է խնդրել, սակայն ընդգծել է, որ հանգուցյալ ֆինանսիստ և մանկապղծության համար դատապարտված Ջեֆրի Էպշտեյնի հետ իր հանդիպումների ընթացքում «ոչ մի անօրինական բան չի արել»։

Թեև մեղադրանքների մեծ մասի մանրամասները մնում են գաղտնի, Գեյթսը հրապարակայնորեն ընդունել է ինտիմ կապը երկու կանանց հետ՝ Միլա Անտոնովայի և իր TerraPower էներգետիկ ընկերության նախկին աշխատակցուհու։

Միլա Անտոնովա։ Գեյթսը նրա հետ ծանոթացել է 2010 թվականին մրցաշարի ժամանակ։ Ավելի ուշ Անտոնովան հովանավորներ էր փնտրում բրիջի դպրոց բացելու համար և կապ է հաստատել Ջեֆրի Էպշտեյնի հետ։ Էպշտեյնը ֆինանսավորել է նրա ուսումը ծրագրավորման դպրոցում, իսկ հետագայում, ըստ քննության վարկածի, օգտագործել է այդ կապի մասին տեղեկությունը Microsoft-ի համահիմնադրի վրա ճնշում գործադրելու համար։

Երկրորդ կինը։ Նրա անունը չի բացահայտվում։ Գործի նյութերում նա նշված է որպես «ռուս միջուկային ֆիզիկոս», որի հետ Գեյթսը ծանոթացել է «գործնական գործունեության շրջանակում»։ Նա մոտ երկու տարի աշխատել է Գեյթսի TerraPower ընկերությունում։ Ժողովի ընթացքում անհանգստացած աշխատակիցներին հանգստացնելու փորձով հիմնադրամի ղեկավարությունը հայտարարել է, որ կինը իրականում հաշվառված է եղել մայր ընկերությունում, ինչը միայն ավելի է շփոթեցրել անձնակազմին։

Ինչպես երևում է Էպշտեյնի 2013 թվականի անձնական նամակագրությունից Բորիս Նիկոլիչի հետ (որը այն ժամանակ Գեյթսի գիտության և տեխնոլոգիաների գլխավոր խորհրդականն էր), սկանդալային ֆինանսիստը տեղեկացել էր Գեյթսի սիրային արկածների մասին և փորձում էր շանտաժի ենթարկել ՏՏ մագնատին։

Նույն նամակներում կային նաև ակնարկներ, թե իբր Նիկոլիչը օգնել է Գեյթսին գաղտնի ձեռք բերել դեղատոմսով տրվող դեղամիջոցներ «ռուս աղջիկների հետ ինտիմ կապերի հետևանքները վերացնելու համար»։

Ինքը՝ Բորիս Նիկոլիչը, կտրականապես հերքել է այդ կասկածները՝ հայտարարելով, որ այդ էլեկտրոնային նամակները երբեք չեն գրվել Գեյթսի անունից կամ նրա հանձնարարությամբ։ Բիլ Գեյթսի պաշտոնական ներկայացուցիչը ցանկացած ակնարկ, թե միլիարդատերը բուժվել է սեռական ճանապարհով փոխանցվող հիվանդություններից, անվանել է «բացարձակապես անհեթեթ և ամբողջությամբ կեղծված»։

Կորպորատիվ ժողովի ավարտին Բիլ Գեյթսը ընդունել է, որ բազմիցս հանդիպել և ժամանակ է անցկացրել Էպշտեյնի հետ Նյու Յորքում, Գերմանիայում, Ֆրանսիայում և Վաշինգտոնում, սակայն կտրականապես հերքել է այն լուրերը, թե երբևէ այցելել է Լիթլ Սենթ Ջեյմս՝ Կարիբներում գտնվող Էպշտեյնի տխրահռչակ մասնավոր կղզին։

Source: https://news.am/hy/news/1040208