Լիտվան դարձել է ՆԱՏՕ առաջին երկիրը, որը պաշտպանության համար հատկացրել է ՀՆԱ ավելի քան 5 տոկոսը, հայտնել է երկրի ԱԳՆ-ն. «Մենք վճռականորեն հավատարիմ ենք պաշտպանությանը։ Լիտվան հուսալի դաշնակից է, որը օրինակ է ծառայում»։ 2026 թվականին հանրապետության ռազմական ծախսերը կհասնեն ՀՆԱ 5,38 տոկոսին կամ 4,79 մլրդ եվրոյի, հայտնել էր Լիտվայի պաշտպանության նախարար Ռոբերտաս Կաունասը։ Նախորդ տարիներին Լիտվան պաշտպանության վրա ծախսում էր ՀՆԱ 3 տոկոսից քիչ ավելին։
Ծախսերի ավելացումը դարձել է պաշտպանունակության ամրապնդման ծրագրի մի մասը՝ Ուկրաինայում պատերազմի և Բալթյան երկրների՝ Ռուսաստանի կողմից հնարավոր սպառնալիքների վերաբերյալ մտահոգությունների ֆոնին։ «Եթե մենք չներդնենք մեր անվտանգության մեջ, ոչ ոք չի գա մեզ պաշտպանելու», — պարզաբանել է Կաունասը։ Նա նշել է, որ պետության պաշտպանությունը կառուցվում է երկու սկզբունքի վրա՝ ազգային հնարավորություններ և կոլեկտիվ պաշտպանություն ՆԱՏՕ շրջանակում։
2026 թվականի բյուջեն նախատեսում է ռազմական ծախսերի ավելացում 1,59 մլրդ եվրոյով։ Լրացուցիչ միջոցները նախատեսվում է ուղղել զինված ուժերի արդիականացմանը, հակաօդային պաշտպանության համակարգերի զարգացմանը և ծանր ռազմական տեխնիկայի գնմանը։ Լիտվան մտադիր է ձեռք բերել նոր ՀՕՊ համակարգեր, ինչպես նաև վերացնել բալիստիկ և թևավոր հրթիռներից պաշտպանության միջոցների պակասը։ Ամենախոշոր նախագծերից մեկը կլինի գերմանական Leopard 2A8 տանկերի մատակարարման պայմանագիրը։ Եվս մոտ 700 մլն եվրո կհատկացվի պաշտպանական պետական հիմնադրամի միջոցով՝ անվտանգության ոլորտի նախագծերի համար։
Վիլնյուսի որոշումն ընդունվել է ՆԱՏՕ ներսում պաշտպանական ծախսերի ավելացման վերաբերյալ ձեռք բերված պայմանավորվածություններից հետո։ Անցյալ տարի Հաագայում կայացած դաշինքի գագաթաժողովում անդամ երկրները պայմանավորվել էին մինչև 2035 թվականը ռազմական ծախսերի նպատակային ցուցանիշը ներկա 2 տոկոսից հասցնել ՀՆԱ 5 տոկոսի։ Գագաթաժողովի վերջնական հռչակագրի համաձայն՝ երկրները պետք է ՀՆԱ առնվազն 3,5 տոկոսն ուղղեն հիմնական պաշտպանական կարիքներին և ՆԱՏՕ ռազմական նպատակների կատարմանը, իսկ ևս մինչև ՀՆԱ 1,5 տոկոսը՝ կրիտիկական ենթակառուցվածքների պաշտպանությանը, տնտեսության կայունության բարձրացմանը, նորարարություններին և պաշտպանական արդյունաբերության զարգացմանը։ Նույն հռչակագրում Ռուսաստանն անվանվել է «եվրատլանտյան անվտանգության երկարաժամկետ սպառնալիք»։
Source: https://news.am/hy/news/1041177
