Ֆրանսիայի կառավարությունը բախվել է հանրային վրդովմունքի մեծ ալիքի՝ Լիաննա անունով 11-ամյա աղջկա սպանության պատճառով, հայտնում է France 24-ը։
Վրդովմունք է առաջացրել այն փաստը, որ գլխավոր կասկածյալը նախկինում բազմիցս մեղադրվել է երեխաների նկատմամբ սեքսուալ բռնություն գործադրելու մեջ, սակայն իրավապահ համակարգի անփութության պատճառով մնացել է ազատության մեջ։
Ֆրանսիայի նախագահ Էմանուել Մակրոնը, գտնվելով Չեռնոգորիայում ընթացող եվրոպական գագաթնաժողովում, կատարվածն անվանել է «անընդունելի ձախողում» և վարչապետ Սեբաստիան Լըկոռնյուի կառավարությունից պահանջել է քննչական մարմինների աշխատանքի մանրակրկիտ հետաքննություն անցկացնել։ Այդ ֆոնին արդարադատության նախարար Ժերալդ Դարմանենը Փարիզում շտապ խորհրդակցության է կանչել բոլոր պետական դատախազներին։
Լիաննան անհետացել էր մայիսի 29-ին Ֆրանսիայի հարավ-արևմուտքում գտնվող Ֆլյորանս գյուղում՝ օտար ավտոմեքենա նստելուց հետո։ Մի քանի օր տևած որոնումներից հետո նրա մարմինը՝ բռնության հետքերով, հայտնաբերվել է լքված սիլոսահորում։ Կասկածյալը 41-ամյա մի տղամարդ է՝ երկու երեխաների հայր, որի դուստրը սովորում էր մահացած աղջկա հետ նույն դպրոցում։
Ինչպես հայտարարել է դատախազ Կլեմանս Մեյերը, ձերբակալվածի նկատմամբ նախկինում երեք անգամ ոստիկանությունում դիմում է ներկայացվել. 2017 թվականին՝ 17-ամյա աղջկա հետ կապի համար (գործը փակվել է համաձայնության մասին հայտարարության պատճառով), 2022 թվականին՝ 15 տարեկանից ցածր երեխայի պղծման համար (գործը փակվել է 2024 թվականին՝ ապացույցների պակասի պատճառով) և 2025 թվականի օգոստոսին, երբ 2014 թվականին ծնված մի աղջկա մայր մեղադրել է նրան իր դստեր հանդեպ պարբերական բռնություն գործադրելու մեջ։ Չնայած այս վերջին ծանր մեղադրանքին՝ ոստիկանությունն ինը ամիսների ընթացքում այդպես էլ չի հարցաքննել տղամարդուն, ինչն էլ ի վերջո հանգեցրել է նոր ողբերգության։
CIIVISE անկախ հանձնաժողովի իրավապաշտպանները նշում են, որ այս դեպքը բացահայտեց համակարգային խնդիր. Ֆրանսիայում անչափահասների նկատմամբ սեքսուալ բռնության վերաբերյալ գրեթե չորս գործից երեքը փակվում է, իսկ երեխաների պղծման գործերով մեղադրական դատավճռի է հասնում գործերի միայն 3%-ը։
Ողբերգությունն արդեն իսկ քաղաքական երանգ է ստացել առաջիկա նախագահական ընտրություններից առաջ. տարբեր կուսակցությունների թեկնածուներ, այդ թվում՝ կենտրոնամետ Էդուար Ֆիլիպը և աջակողմյան առաջնորդ Ժորդան Բարդելան, խստորեն քննադատել են պետական ապարատը՝ հայտարարելով, որ այս հանցագործությունը հնարավոր կլիներ կանխել, եթե դատական համակարգը հավատար զոհերին։
Source: https://news.am/hy/news/1041311