Բրիտանական BP էներգետիկ ընկերությունը պատրաստվում է հուլիսի 1-ից Բաքու-Թբիլիսի-Ջեյհան (BTC) նավթամուղի օպերացիոն կառավարումը պայմանագրային պարտավորությունների շրջանակում փոխանցել Ադրբեջանի պետական նավթային ընկերությանը՝ SOCAR-ին, հայտնում է Reuters-ը։

Ադրբեջանի, Վրաստանի և Թուրքիայի գծով BP-ի տարածաշրջանային նախագահ Ջովանի Քրիստոֆոլին հայտարարել է, որ կառավարման փոխանցումը չի նշանակում BP-ի դուրս գալ նախագծից։ Ըստ նրա՝ ընկերությունը «ոգևորությամբ» է վերաբերվում այն փաստին, որ SOCAR-ը կստանձնի օպերատորի գործառույթները։

BP-ն չի պատասխանել հայտարարության մեջ նշված պայմանագրային պարտավորությունների բնույթը պարզաբանելու և այն մասին հարցմանը, թե արդյոք դա կազդի նախագծում ընկերության բաժնեմասի վրա։

SOCAR պետական նավթային ընկերությունն իր AzBTC կառույցի միջոցով տնօրինում է BTC-ի 32,97% բաժնեմասը։ BP-ին պատկանում է 30,1%-ը, իսկ մնացած մասը բաշխված է նախագծի ութ այլ մասնակիցների միջև։

Source: https://news.am/hy/news/1040413