ԱՄՆ նախագահ Դոնալդ Թրամփի վարչակազմը երեքշաբթի պատժամիջոցներ է սահմանել իրանական խոշորագույն կրիպտոարժութային բորսայի նկատմամբ՝ Թեհրանի վրա ճնշում գործադրելու արշավի շրջանակում։

Պատժամիջոցները տարածվել են Nobitex կրիպտոարժութային բորսայի, դրա գլխավոր գործադիր տնօրենի և երեք համահիմնադիրների, ինչպես նաև իրանական ևս երեք կրիպտոարժութային հարթակների նկատմամբ։

ԱՄՆ ֆինանսների նախարարությունը Nobitex-ին մեղադրել է «Իրանի ահաբեկչական գործունեության, պատժամիջոցների շրջանցման և Իսլամական հեղափոխության պահապանների կորպուսին (ԻՀՊԿ) առնչվող վճարումներին աջակցելու մեջ՝ ներառյալ ԻՀՊԿ-ին առնչվող և շորթողական ծրագրեր օգտագործող հակերային խմբերի գործողությունները»։

Գերատեսչությունը նաև հայտարարել է, որ Nobitex-ն օգնել է Իրանի կենտրոնական բանկին հասանելիություն ստանալ հարյուր միլիոնավոր դոլարների սթեյբլքոյններին, որոնք օգտագործվել են կտրուկ արժեզրկվող իրանական ռիալին աջակցելու համար։

Բացի դրանից, ԱՄՆ ֆինանսների նախարարության տվյալներով, հարթակը Իրանի իշխանությունների ներկայացուցիչներին հնարավորություն է տվել մուտք գործել միջազգային կրիպտոարժութային բորսաներ և շրջանցել պատժամիջոցները տարբեր իրավասություններում։

«Իրանի դեմ ԱՄՆ-ի ռազմական գործողությունների սկսվելուց հետո Nobitex-ը դեր է խաղացել Իրանից ակտիվների ու միջոցների պաշտպանության և դուրսբերման գործում՝ օգնելով թաքցնել ռեժիմի կապիտալները՝ չնայած ինտերնետի անջատումներին»,- ասված է գերատեսչության հայտարարության մեջ։

Source: https://news.am/hy/news/1040428