Կուբայի նախկին նախագահ Ռաուլ Կաստրոն՝ հեղափոխական շարժման առանցքային մասնակիցներից մեկը և երկրի նախկին առաջնորդը, առաջին անգամ հանրությանը ներկայացել է այն բանից հետո, երբ ԱՄՆ-ը նրան մեղադրանքներ է առաջադրել 1996 թվականին երկու քաղաքացիական ինքնաթիռների կործանման մեջ ունեցած ենթադրյալ դերի համար, հաղորդել է Associated Press-ը։
95-ամյա Կաստրոն հանրությանը ներկայացել է Հավանայի ներքին գործերի նախարարությունում իր ծննդյան օրվա տոնակատարության ժամանակ։ Միջոցառմանը ներկա էին բարձրաստիճան պաշտոնյաներ և ռազմական ղեկավարներ։ Պետական հեռուստատեսության տվյալներով՝ նա դահլիճ է մտել խակի գույնի զինվորական համազգեստով, նրան դիմավորել են ծափահարություններով։
Կուբայի նախագահ Միգել Դիաս-Կանելն իր ելույթի ընթացքում Կաստրոյին անվանել է «հերոսության և արժանապատվության» խորհրդանիշ, ինչպես նաև ընդգծել նրա դերը երկրի և հեղափոխության պատմության մեջ։ Նա հայտարարել է, որ «Ռաուլը Կուբան է, իսկ Կուբան անձեռնմխելի է»՝ ուժեղացնելով միասնության հռետորաբանությունը ԱՄՆ-ի հետ հարաբերությունների սրման ֆոնին։
Վաշինգտոնն ավելի վաղ Ռաուլ Կաստրոյին մեղադրանքներ էր առաջադրել՝ կապված 1996 թվականի միջադեպի հետ, երբ խոցվել էին երկու ինքնաթիռներ, որոնք պատկանում էին Մայամիի կուբացի էմիգրանտներին։ Սա դարձել էր Դոնալդ Թրամփի վարչակազմի ճնշման ավելի լայն արշավի մի մասը, որը ներառում է պատժամիջոցների խստացում և կղզի վառելիքի մատակարարումների սահմանափակում։
Ի պատասխան՝ Կուբայի իշխանությունները հայտարարել են, որ երկիրը ԱՄՆ-ի համար սպառնալիք չի ներկայացնում և մերժում են մեղադրանքները՝ դրանք համարելով քաղաքական դրդապատճառներով պայմանավորված։ Հավանան նաև նախազգուշացնում է հնարավոր «վճռական պատասխանի» մասին, եթե Վաշինգտոնի ճնշումը հետագայում սրվի։
Source: https://news.am/hy/news/1041448