Healthy Seas բնապահպանական կազմակերպության սուզորդները բաց ծովում՝ Սիցիլիայի և Թունիսի միջև, զբաղված էին խորտակված նավը լքված ձկնորսական ցանցերից մաքրելով, երբ անսպասելիորեն հանդիպեցին ահեղ գիշատչի։ Նրանց նկարահանած կադրերը համարվում են Միջերկրածովյան ավազանում իր բնական ստորջրյա կենսամիջավայրում հասուն մեծ սպիտակ շնաձկան՝ աշխարհում առաջին տեսաձայնագրությունը։
Սովորաբար մեծ սպիտակ շնաձկները բնակվում են բարեխառն և մերձարևադարձային առափնյա ջրերում, հատկապես Խաղաղ օվկիանոսի հյուսիսարևելյան հատվածում, Հարավային Աֆրիկայի ափերի մոտ և Օվկիանիայում։ Սակայն այս հայտնագործությունն ապացուցում է, որ այս տեսակը այժմ շրջում է նաև Եվրոպայի ափերի մոտ։
«Վիճակագրորեն դուք շատ ավելի մեծ շանս ունեք վիճակախաղում գլխավոր մրցանակը շահելու, քան ջրի տակ հանդիպելու այս խորհրդանշական կենդանուն, — կիսվել է այս եզակի հանդիպումը նկարահանած սուզորդ Դերկ Ռեմմերսը։ — Կարող ես տասնամյակներով սուզվել խորտակված նավերի մոտ և կտրել հին ցանցերը, բայց ոչինչ չի կարող քեզ նախապատրաստել նման պահի։ Բաց ծովում՝ Միջերկրականում, շնաձկան հանդիպելը խելահեղություն է։ Այնուամենայնիվ, մենք շարունակեցինք սուզումը ըստ պլանի, քանի որ այս դրվագը տեսանելիորեն ցույց տվեց, թե որքան կարևոր է մեր աշխատանքը էկոհամակարգի մաքրման գործում»։
Ավելի վաղ մեծ սպիտակ շնաձկներին երբեմն նկատել էին Միջերկրական ծովի մակերեսին, սակայն մինչև այս պահը սուզորդների կողմից արված լիարժեք ստորջրյա նկարահանումներ չէին գրանցվել։
Գիտնականները հույս ունեն, որ այս կադրերը կօգնեն լույս սփռել մեծ սպիտակ շնաձկների միգրացիայի և գլոբալ տարածման առանձնահատկությունների վրա։
Միջերկրածովյան այս հայտնագործությունը ժամանակավորապես համընկել է գիտնականների նախազգուշացումների հետ, որ գլոբալ տաքացման պատճառով մեծ սպիտակ շնաձկները տեսանելի ապագայում կարող են հայտնվել նաև Մեծ Բրիտանիայի ափերի մոտ։
Source: https://news.am/hy/news/1041991